केवळ आपल्या स्वार्थासाठी कलह नसावा घरामध्ये,
आपुलकीच्या नात्यांमधुनी स्नेह जपावा मनामध्ये ॥१॥
येणाऱ्याला पाणी द्यावे, मुखांत वाणी गोड हवी,
जाणाऱ्याच्या मनांत फिरूनी येण्याविषयी ओढ हवी. ॥२॥
ऐसा प्रेमळ माणुसकीचा झरा वहावा मनामध्ये,
भांड्याला लागते भांडे, विसरूनी जांवे क्षणांमध्ये. ॥३॥
परस्परांना समजुनी घ्यावे, अढी नसावी मनामध्ये,
रुसवे-फुगवे नको फुकाचे, मोद रहावा घरामध्ये. ॥४॥
नित्य काळजी घरात घ्यावी-वय झालेल्या पानांची,
ज्याला त्याला द्यावी जागा, वया प्रमाणे मानाची. ॥५॥
एकमताने निर्णय घ्यावा- नको दुरावा मनामध्ये,
एक तीळ ही सात जणांनी वाटून घ्यावा घरामध्ये ॥६॥
नको घराला गर्व धनाचा- लिन रहावे प्रभुचरणी,
लळा जिव्हाळा आंत असावा नको उमाळा वरकरणी. ॥७॥
दिवसा रात्री परमेशाचा वास असावा घरामध्ये,
आपुलकीच्या नात्यांमधुनी स्नेह जपावा मना मध्ये ॥८॥
कवयत्री : विमल लिमये.
- फ़ुलपाखरू
- आपल्या सर्वांच्या मनात एक फ़ुलपाखरू दडलेले असते आणि ते नेहमी मुक्त असे उडू पाहत असते. त्याला स्वातंत्र्य हवे असते. त्याचप्रमाणे आपल्या मनाला विविध रंग असतात......फ़ुलपाखराप्रमाणे. परंतु काहींना संधी न मिळाल्याने, मनाजोगती नोकरी, व्यवसाय किंवा तत्सम गोष्टी करायला न मिळाल्याने नैराश्य येते. या नैराश्याला काहीच अर्थ नाही. कारण तसे केल्याने आपल्याला त्या संधी पुन्हा गवसणार नसतात. परंतु सर्वांनी जर फ़ुलपाखराचा आदर्श घेतला तर मला असे वाटत नाही की कोणाच्या जीवनात चिंता, काळजी या गोष्टी येतील. कारण फ़ुलपाखरू बनण्यासाठी त्यालादेखील कष्ट घ्यावे लागतात, मग आपण का करू शकत नाही कष्ट! फ़क्त आपल्या मनाची तशी तयारी मात्र हवी हं! हा ब्लॉग एका विशिष्ट चाकोरीतील नाही. तर फ़ुलपाखरू जसे एकाच फ़ुलावर कधीच बसत नाही त्याप्रमाणे विविध विषयांना हाताशी धरून तयार केलेला आहे. आपल्या सभोवती काय काय घडत आहे याचा घेतलेला आढावा म्हणजेच "मनातील फ़ुलपाखरासंगे....."होय.
बागेतील फ़ुलपाखरांची संख्या
No comments:
Post a Comment